Balik na sa pagkaon og bugas gikan sa National Food Authority (NFA) ang mga piniriso sa Cebu Provincial Detention and Rehabilitation Center (CPDRC).

Kini human usab na-pull out na sa Kapitolyo gikan sa NFA sa 180 sa kapin sa 900 ka mga sako sa bugas humay gikan sa ahensiya niadtong Martes.

Nunot sa giingong pagnihit sa NFA rice sayo niining tuiga, ang CPDRC nigamit og commercial rice hangtod sa buwan sa Hunyo.

Gitug-an sa Provincial General Services Office (PGSO) nga hingpit nang naka-pull out ang Kapitolyo ug dul-an sa 200 ka sako sa NFA rice niadtong Martes alang sa konsumo sa mga piniriso sa CPDRC ug gani tua na kini sa prisohan sa pagkakaron.

Giklaro hinuon ni PGSO head Jone Sepe nga moabot sa 937 ka sako sa bugas-humay ang ilang gi-order gikan sa NFA alang usab sa usa ka buwan nga konsumo sa mga piniriso apan 180 pa ka sako ang hingpit nilang nakuha.

Moabot sa P1.5 milyones ang nabayad sa Kapitolyo alang niini.

Kung kaniadto, anaa lang sa P1,500 ang presyo niini, gitug-an ni Sepe nga napalit na nila kini karon sa presyo nga P1,600 matag sako.

Mao kini hinungdan nga gi-adjust usab sa Kapitolyo ang ihap sa NFA rice nga kuhaon gikan sa ahensiya.

Nasayran nga hingpit nga na-available sa kamerkadohan sa Sugbo ang NFA rice sa miagi lang nga semana.

Kini human usab naabot na dinhi ang gi-import nga bugas sa NFA. Tungod sa nagkataas nga ihap sa mga piniriso sa CPDRC, nisaka usab ang demand alang sa bugas alang sa ilang konsumo.

Kun niadtong Pebrero, anaa lang sa 30 ka sako sa bugas matag adlaw ang makonsumo sa kapin sa 3,600 ka mga piniriso, karon nisaka na kini ngadto sa 33 ka sako matag adlaw alang usab sa dul-an 4,000 ka mga piniriso.

Sigun ni Sepe, kanunay nga mo-adjust ang Kapitolyo sa budget alang sa kaon sa mga piniriso kay matag karon ug unya, mosaka man ihap sa mga indibidwal nga kinahanglang pakan-on sud sa bilangguan.(AZLG)