NI-GRADWAR na ang unang batch sa ilang 20 ka adlaw nga pagbansay sa "Tsuper Iskolar Program" nga gihuptan sa Technical Training Center of South Cebu Inc. ug sa Technical Education and Skills Development Authority (TESDA) niadtong Huwebes sa buntag, Nobyembre 14, 2019, sa dakbayan sa Naga, habagatang Sugbo.

Adunay 100 ka ang nigradwar sa pagbansay-bansay sa pag-operate ug mga bug-at nga mga kagamitan sama sa hydraulic excavator, bulldozer ug uban pa.

Natunga sa tulo ka mga matang ang maong mga nigradwar diin 50 niini ang gibansay sa hydraulic excavator, 25 niini sa motor grader ug ang nahabilin nga 25 mao gibansay sa pag-operate sa bulldozer.

Ang Tsuper Iskolar usa ka programa sa TESDA ug Department of Transportation (DOTr) diin hatagan og libreng skills training program sa mga drayber o sa ilang duol nga paryente nga maapektohan sa umaabot nga PUV modernization program sunod tuig.

Sa maong program, ipaubos sa pagbansay-bansay ang mga PUJ drivers kung unsaon pagmaneho og mga heavy equipment, pagmasahe, serbisyo sa pagkaon ug ilimnon, shielded metal arc welding, housekeeping, caregiving, pastry ug paghimo og pan, serbisyo sa pag-atiman sa katahum ug pag-instalar ug pagpadayon sa kuryente.

Kung makagradwar ang mga beneficiaries niini, makadawat sila National Certification 2 (NC 2) gikan sa TESDA.

Matod ni Clarissa Geraldo, Supervising technical and skills development specialist sa TESDA Cebu, nga adunay silay 1,000 ka slot alang sa maong training og padayon gihapon ang ilang pagbansay.

Sigon usab ni Henry Ratcliffe, TESDA Specialist 1, nga ang maong mga nigradwar nag gikan sa lain-lain nga mga organisasyon ug mga rota sa mga jeep diri sa Sugbo.

Dungag niya nga magpatawag sila og meeting sa mga drayber nga aron ilang mapangutana kung unsay gusto nga kurso nga ilang ganahan kuhaon alang sa maong scholarship.

Si Marti Avila, 29 anyos og taga dakbayan sa Talisay, usa sa mga nigradwar nga nisaysay sa iyang gibati nga naghikab-hikab siya sa umaabot ug kini nindot pud kay anaa kay NC II nga lisod kuhaon.

“Lipay kaayo, kaming tanan nga naa ning programaha sa gobyerno, sa TESDA. Bag-ong skills para basig sa umaabot nga panahon, maka abroad ko kay daghan man ug heavy equipment operator nga hiring sa gawas, mao pud among giapas pud kung pwede makalarga mi.” sigon ni Avila.

Gawas sa certificate of completion, nakadawat usab sila ug P7,000 nga cheke isip training support fund sa 20 ka adlaw nga training. diin ang ikibali ug Php350 matag adlaw. (Superbalita Cebu)