DILI na maproblema og pangita og trabaho si Lou Mervin Tristan Mahilum, ang ni-top sa niaging November 2019 Civil Licensure Examination, human kini gitanyagan sa kagamhanan sa dakbayan sa Talisay nga mutrabaho isip kawani sa City Engineering Office.

Mismo si Talisay City Mayor Gerald Anthony "Samsam" Gullas Jr. maoy nitanyag sa maong ganti ni Mahilum sa dihang nibisita ang mayor sa iyang balay sa Barangay Dumlog niadtong Dominggo, Nobyembre 24, 2019.

Personal nga giduaw ni Gullas ang panimay ni Mahilum aron sa personal nga motimbaya kaniya ug sa iyang inahan nga si Lorna.

Si Mahilum, nga nigradwar sa University of San Carlos (USC), ang nag-first place sa pinakauwahing Civil Engineering Licensure Examination. Nakakuha kini og 93.25 percent nga rating sa maong exam.

Sa iyang Facebook post, nibutyag si Gullas nga dako nga garbo si Mahilum sa dakbayan sa Talisay ug angay nga sumdanan ang ilang pamilya.

Si Mahilum kamanghuran sa tulo ka mga anak sa magtiayong Lorna ug Mervin, kansang amahan ug mga igsuon ang nanarbaho na sa gawas sa nasud, isip seaman ug enhinyero.(Superbalita Cebu)