NIGUWA nga negatibo sa coronavirus disease (Covid-19) ang TV personality nga si Roy "Yuri Richards" Deldig human nga nakadawat na sa resulta ang city health office sa Lapu-Lapu gikan sa Regional Epidemiology and Surveillance Unit sa Department of Health.

Si Lapu-Lapu City Mayor Junard Chan maoy mibutyag sa maong resulta Huwebes, Abril 2, 2020 sa iyang Facebook page.

"Naibtan ta og tunok sa kaning niguwa nga resulta, apan bisan pa man nihimo tag proactive ngadto sa area," sigon ni Chan sa Superbalita Cebu.

Ang naila sa publiko nga Mother Butanding ug Mrs. Yuri Richards mipanaw Martes, Marso 31.

Si Deldig nakabsan sa iyahang kinabuhi sa usa ka pribado nga tambalanan sa Dakbayan sa Sugbo human kini naglisod og ginhawa ug giatake.

Matod sa nakuha nga impormasyon ning mantalaan, nakasinati og hilanat, ubo, ug sip-on si Yuri sa nakalabay nga adlaw ug nakadesisyon kini nga magpacheck-up sa tambalana human kini maglisod og ginhawa.

Si Yuri nagpangedaron og 42, usa ka talent sa GMA 7 ug kolumnista sa Banat News. (FVQ ug usa ka report ni HBL)