PATAY ang usa ka ex-convict human gipauwana'g bala sa duha ka suspek ala 1:30 sa kadlawon sa Biyernes, Agosto 5, 2022, sa Sitio Looc, Barangay Tayud, lungsud sa Consolacion.

Mike Francis Rosel Cena, 23, napriso kaniadto sa kaso'ng pagpangawat.

Si Police Staff Sergeant Rechie Gilleran, imbestigador sa Consolacion Police Station nga nahinabi sa Superbalita Cebu, mihulagway sa biktima nga usa ka notado'ng kawatan.

Matud niya nga ang biktima diha sulod sa ilang panimalay ug dunay gika-estorya sa cellphone diha'ng misulod ang duha ka suspek og mipusil kaniya sa makadaghan'g higayon.

Ang bitkima patay diha-diha.

Ang wala mailhing mga suspek naglakaw lang nga nibiya sa crime scene.

Ang mga sakop sa Consolacion Emergency Response Team nidala sa biktima sa Eversly Child Sanitarium and General Hospital sa dakbayan sa Mandaue diin gideklarar ang naulahi nga dead on arrival.

Ang napulisan nakakuha og unom ka kabhang sa bala sa kalibre .45 nga armas ug usa ka slug gikan sa nahitaboan.

Matud ni Gilleran nga wala nila gisalikway ang posibilidad nga daghang nasuko sa biktima sanglit gibantog siya nga notadong kawatan sa ilang lugar. (GPL, TPT)