USA ka tulisan ang gituohan nga giingong nagplano nga makapamiktima atol sa kasaulogan sa Valentine’s Day, ang pakyas sa tinguha human nasikop sa kapulisan sa dakbayan sa Mandaue niadtong Huwebes sa gabii, Pebrero 14.

Naaktuhan si Mark Villarin Matunog, 28, taga Sta. Cruz sa Guizo, nga adunay dalang armas nga .38 revolver nga adunay duha ka bala samtang nagbadhas sa dan C.D. Seno, Barangay Guizo sa alas 8:45 sa gabii.

Gawas niini, gihulagway sa pangulo sa kapulisan sa Mandaue City Police Office (MCPO) nga nagmalinawon sa kinatibuk-an ang pagsaulog sa Valentines Day sa siyudad.

Human kini naaktuhan sa mga nanag-roving nga pulis nga nagtarong sa iyang maong armas nga gi-tuck-in sa iyang likod.

Matod ni Chief Insp. Aldrin Villacampa, hepe sa Centro Police Station nga sa pakisusi nasuta, gikan kini nag-inom diha sa usa ka mall sa may North Reclamation Area, nakigsaulog sa Valentines Day.

Human nga nakainum, gituohan kini nga padung unta mangigo sa mga biktimahunon nga mga nanaglakaw sa maong lugar, sama nalang sa mga nanag-date nga manag-uyab, magbarkada o pamilya o nag-inusara nga naglakaw.

Sa gihimo nga pag-background check, nasuta nga kini ang usa sa mga gipangitasa pulis nga notadong tulisan sa maong lugar.

“Kay nakainom naman, nangatol siguro, gusto na sab nga manulis. Sukad pa ni kato batan-on pa naa nay record, nya sukad sa niaging tuig hangtud karon, mao ni siya ang i-describe sa mga mabiktima sa tulis, nga maglakaw lang diha sa dalan, dapit sa CICC, diha sa Bai hotel, kana padung sa Parkmall, mao gyud ni siya,” gitug-an ni Villacampa sa Superbalita Cebu.

Panawagan karon ni Villacampa sa mga nabiktima sa tulis sa maong lugar sa pagduaw sa ilang buhatan aron personal nga ilhon ug mopasaka og kaso.

Mag-atubang usab si Matunog og mga kaso sa kalapasan sa election gun ban ug paghupot og dili lisensyadong’ armas.

Samtang gawas sa pagkasikop ni Matunog ug laing laki nga hubog nga nagmaoy kinsa nakuhaan og swiss knuckles ug 71 anyos nga babaye nga nag-shoplift og figurine sa usa ka mall, matud ni Police Senior Supt. Julian Entoma nga wala nay mga kremin nga natala, ilabi na sa tibuok adlaw nga pagsaulog sa Valentines day.

Gani sa pag-patrolya sa mga pulis sa MCPO diha sa motel, inn, lodge ug susama nga establisemento, sukad sa hapon hangtud na sa Biyernes sa kaadlawon, Pebrero 15, sukwahi sa nangagi nga katuigan, way nahitabo nga pagtaas sa linya sa mga walk-in ug mga nanagsakyanan.

Pagduda ni Entoma nga posible tungod sa nasinati nga pag-uwan tibuok adlaw sa Huwebes hangtud sa Byernes, ug posibleng paglikay sa na-balita nga pagpatrolya sa mga pulis sa maong mga klase nga establisemento.