Nasikop sa mga tinugyanan sa Talisay City Police Station ang giilang notadong tulisan sa dakbayan sa gilusad nga follow-up operation sa Sabado sa alas 3:00 sa hapon, Hunyo 11, 2022.

Ang nasikop mao si Edgar Sarsuella Ong, 38, usa ka sikyu ug taga Barangay Mohon, Talisay.

Alas 12:30 sa udto sa samang adlaw, nidangop sa kapulisan sila si Cindy Camacho Ababon, dalaga, ug taga Santa Catalina, Barangay Bulacao; ug Jenelyn Nuñez Repunte, 32, taga Tangke, siyudad sa Naga nga nabiktima sa pagpanulis sa Barangay Bulacao ug Barangay Tabunok.

Unang nabiktima si Ababon sa alas 11:00 sa buntag samtang gisunod si Repunte, 30 minutos ang nakalabay.

Dali nga gilusad ang follow-up operation ug nailhan ang suspek pinaagi sa kuha sa CCTV camera.

Matod ni Police Lieutenent Colonel Randy Caballes, hepe sa Talisay City Police Station, nakuha sa posisyon sa suspek ang mga butang sa duha ka biktima sama sa tulo ka cellular phones ug amas sa suspek nga .38 revolver, itom nga helmet ug itom nga motorsiklo.

Si Ong nadakpan na niadtong Mayo 1, 2005 sa kasong murder apan nakagawas ra pipila ka tuig ang nilabay.