VICTORIA, Northern Samar - Tulo ang patay ug duha ang samdan sa pag-atake New Peoples Army (NPA) sa police station ning lungsod.

Ang pag-atake nahitabo alas 3:30 sa kadlawon, Huwebes, Marso 28.

Base sa report sa Police Regional Office (PRO) 8, kapin kun kulang 50 ka mga NPA ang ning-atake sa police station.

Ang police station dunay 15 ka personnel nga gipangulohan sa ilang hepe nga si Police Lieutenent Eladio Aro.

Dugang sa report nga ang mga NPA nagsakay og truck ug nagsul-ob og military fatigue uniforms.

Nagpurong sila og yellow strips sa ilang mga ulo.

Nasayran nga daghang mga babaye nga NPA ang ning-apil sa pag-atake.

Ang kapulisan dali nga nakapwesto sa rooftop sa ilang police station ug nakita dayon ang pagsud sa mga NPA.

Nahuman ang pinusilay alas 6:40 sa buntag.

Patay ang tulo ka gikatahapang mga NPA samtang usa ang nasikop ug narekober ang tag-as nga kalibre sa mga armas.

Samdan ang duha ka mga pulis nga sila si Police Senior Master Sergeant Arturo Gordo, Jr. ug Police Master Sergeant Arnold Cabacang.

Ang duha ka mga pulis naigo sa ilang nawong sa shrapnel, apan minor ra hinuon.

Matod sa PRO 8, ang maong lungsod ubos sa jurisdiction sa Section Committee 2 (SECCOM 2), Sub Regional Committee Emporium sa Eastern Visayas Regional Party Committee sa NPA nga gipangulohan ni Ranie Cabides.

Padayon pa ang operasyon sa mga awtoridad sa paggukod sa mga rebelde sa pagsuwat ning taho.