USA ka police official ang nagplano mga magpapili pagka mayor sa Dakbayan sa Sugbo sa eleksyon karong Mayo 2022.

Si Police Major Chuck Barandog, 37, niingon nga nagpadayon pa ang ilang negusasyon tali sa usa ka national party nga magsilbe niyang partido.

Siya sakop sa Philippine National Police Academy (PNPA) “Sansinirangan” Class 2007.

Apan giklaro sa hepe sa Cebu City Mobile Force Company nga sa pagkakaron, padayon pa niyang gitimbangtimbang sanglit iyang gihulagway nga dili tiaw ang posisyon nga iyang daganan.

Gihulagway niya nga bisan kon anaa siya sa herarkiya sa kapulisan apan iya kining gihisama nga pagpanerbisyo sa publiko diin kinahanglan siyang moluwat sa iyang katungdanan sa higayon nga mahukman niyang magpapili.

Si Barandog nanawagan sa iyang mga supporters nga hatagan una siya og katapusang semana sa paghukom gikan sa Oktubre 1 hangtod sa 8 nga maoy gikatakda sa pagsang-at sa certificate of candidacy para sa mga magpapili.

Dad-on ni Barandog nga plata-porma mao ang padayon nga pagpalambo sa traffic system sa dakbayan sanglit mahinungdanon kini gumikan sa padayon nga paglambo sa ekonomiya sa dakbayan.

Ang flood control program nga iyang hingusgan sa higayon nga siya mapili aron dili makasinati og problema sa pagbaha ang siyudad sanglit ang maong problem padayon nga nasinati sa Cebu City.

Apil usab ang edukasyon diin iyang plano nga ang tanang kabataan sa siyudad maka-eskwela, makapabarog og dugang eskwahan ug pasilidad lakip sa usog nga connection sa internet.(PAC)