GAWAS sa pagpang-apud-apud og flyers alang sa safety tips ug paglikay sa sunog, usa sa lakip sa ilang Oplan Semana Santa sa kabomberuhan sa dakbayan sa Mandaue ang pag-check sa ilang mga ekipo, fire truck ug mga fire hydrants.

Pagpahinumdom ni Fire Insp. Harley Glenn Galpo, ang deputy fire marshal sa dakbayan sa Mandaue, nga alang sa mga mobakasyon, diin mabiyaan gyud ang mga balay o giabangan nga kwarto, siguruon nga naka-unplug ang tanang appliances.

Alang usab sa anaa lang sa ilang mga balay ning Semana Santa, angay nga dili mag-overloading sa paggamit sa ilang mga appliances ug sa mga extension wires.

Kini aron malikayan ang pag-ulbo sa kayo ning panahon sa taas-taas nga bakasyon.

Ang mga fire truck ang ipahimutang duol sa mga simbahan, mga terminal, pantalan ug mga lugar diin ang publiko mopahigayon sa Via Crucis o Way of the Cross. (FMD)