ORMOC City, Leyte - Pasado na sa ikatulo ug pinal nga pagbasa ang ordinansa nga magtukod sa Ormoc City Persons with Disability Affairs Office (CPDAO), Martes, Nobiyembre 19, 2019.

Milanog ang pinakpakay sud sa session hall sa City Hall sa dihang mayoriya sa mga konsehal ang niisa sa ilang mga kamot agi og pag-uyon.

Usa sa misaksi sa sesyon nga si Olivia Saavedra wa makapugong sa pagpatulo sa iyang luha. Si Saavedra adunay anak nga may autism ug alang kaniya dako kaayo og tabang ang maong ordinansa.

“Sa tinud-anay lang, overwhelmed gyod kaayo. Nanlimbawot gyod ako balhibo kay dugay na namo ni gihangyo. Amo giatubang si Mayor (Richard Gomez) before and sa iya pa lang pagtagad namo naa nay gitawag og pag-asa. Sa amo pag follow up sa konseho, pulos gyod good news,” matod ni Saavedra samtang naghilak sa kalipay.

“I just want to say nga Ormoc will be a blessed city kay wa pasagdi ang mga bata nga angels of God. This is the very best gift that we ever had for this year,” dugang ni Saavedra.

Nalatid sa ordinansa nga dunay himuon nga City Persons with Disability Affairs Council diin ang chairperson mismo ang mayor, co-chair ang bise mayor.

Langkuban usab kini sa ubang mga buhatan sa Siyudad, Liga ng mga barangay ug non-government organizations (NGO). (JKDP)