ORMOC CITY, Leyte - Gimando ni Ormoc City Mayor Richard Gomez ang pag-lockdown sa Ormoc District Hospital (ODH) human tulo ka mga nurse nagpositibo sa coronavirus disease (Covid-19).

Matod ni Gomez, usa ka nurse ang nataptan sa Sars-CoV-2, kagaw nga nagdala sa Covid-19, gikan sa Hilongos, Leyte human nitambong sa usa ka selebrasyon.

Pagbalik niini sa iyang trabaho sa ODH, nagpakita na kini og simtomas sa Covid-19 hinungdan nga gikuhaan siya og swab samples.

Nagpositibo kini sa Covid-19 ug dunay 11 ka closed contact sa nurse ang gikuhaan usab og swab samples.

Gi-isolate dayon ang nurse lakip na ang mga closed contact niini. Sa 11, duha ang positibo sa kagaw.

Martes sa buntag, Septiyembre 29, nipatawag og usa ka emergency meeting si Gomez uban sa mga sakop sa Covid-19 Task Force.

Gikonsiderar sa task force nga ciritical zone ang ODH diin way bisan kinsa nga makasulod ug makagawas.

Gipamutangan dayon og upat ka command posts ang palibot sa ODH aron ma-regulate ang pag agi sa mga sakyanan.

Ang mga tawo nga dunay ihatud nga pagkaon ug gamit, kutob lang sa kordon o yellow caution line sa ODH.

Ang mga pulis na ang ningahatod sa hatagan sa mga kabanay sa mga pasyente.

Gimandoan usab ni Gomez ang City Social Welfare and Development Office (CSWDO) sa paghatag og foodpacks sa mga tawo nga naa sud sa ODH lakip na ang nga nagbantay nga mga pulis ug barangay tanod.

Matod ni Gomez, 14 ka adlaw ang pag-lockdown sa tambalanan samtang gipaabot nga mahuman ang contact tracing ug mogawas ang tanan resulta sa swab test.

Ang mga tawo nga nagkinahanglan sa serbisyo sa ODH, giabisohan nga moadto lang usa sa ubang district hospitals o sa Eastern Visayas Regional Medical Center.