DILI momenos 80 ka mga panimay ang hingpit nga naugdaw sa nahitabong sunog sa sitio Silangan 2 ,Barangay Tejero sa siyudad sa Sugbo samtang 10 ka panimay ang partial nga nasunog.

Moabot usab sa P1 million ang danyos sa maong sunog nga nagsugod sa panimay ni Preciano Karomayan nga giabangan ni Joie Bantugan.

Nadawat sa kabomberohan ang alarma sa sunog alas 4:50 gahapon sa hapon Abril 26 nga giisa nila sa task force alpha pagka alas 5:11 sa hapon.

Matod ni Cebu City Fire Marshal Noel Nelson Ababon ang fire marshall sa siyudad sa Sugbo nagkanayon nga tanang mga fire trucks nga avilable sa metro Cebu mi responde sa alarma.

Giingong nagduwa ug kayo ang 5 anyos nga anak lalake ni Joie Batulan nga maoy hinungdan nga daling mitapot sa foam sa higdaanan sa ilang kwarto.

"Atoa pa nang imbestigaron kung unsa na ka tinuod kay sa pagkakaron wala pa tay impormasyon ana," matod ni Ababon.

Pero si Batulan mihimakak nga nagduwag kayo ang iyang anak sanglit niadtong tingura naa kini sa gawas nagduwa uban sa maguwang niini.

"Dili sir oy kay naa rana sila sa gawas, natingala nalang mi nga mi kayo na among balay," matod ni Batulan.

Kasamtangan nga naa gipahimutang sa barangay gym sa Tejero ang mga pamilyang nasunogan.(AYB/GPL)