MOKABAT sa P10.2 milyunes nga balor sa illegal nga drugas ang nasakmit gikan sa gilusad nga anti-drug operation sa mga awtoridad sa Sitio Bilibid, Barangay Casay, lungsod sa Argao.

Ang maong operasyon giulohan ni Senior Inspector Alejandro Batobalonos sa Provincial Drug Enforcement Unit sa Cebu Provincial Police Office.

Ang dinakpan giila nga si Tocelio Dibalucos Ababon, 49, taga Barangay Tabunok, dakbayan sa Talisay nga nalakip sa high- value target sa kapulisan sa probinsya.

Nakuhaan siya og pito ka dagkong pakete nga nga gituohang 'shabu' nga mu- timbang sa 1.5 kilos.

Matod ni Batobalonos nga dugay na nilang gipangita si Ababon human milayas sa Talisay City tungod sa subsub nga kampanya sa kapulisan batok sa illegal nga drugas.