MOBALOR og P1.1 million sa gituohang shabu ang nasakmit sa kapulisan sa duha ka managlahi nga mga buy-bust sa dakbayan sa Talisay ug Cebu City.

Sa Talisay City, nabalhog na sa prisohan ang manag live-in partners nga taga Brgy. Tisa, Dakbayan sa Sugbo human ang babaye nasikop sa buy-bust sa kapulisan sa dakbayan.

Si Maria Lourdes Monte de Ramos, 41, taga Sityo Nangka, Barangay Tisa, napusasan sa Martes sa kaadlawon, Marso 8, sa buy-bust sa Talisay City Police Drug Enforcement Unit (DEU) sa Barangay Tabunok.

Si Police Lieutenant Elwood Ebona, team leader sa DEU, niingon nga ilang nasakmitan og 100 gramos si Monte de Ramos. Duna kini street value nga P680,000.

Nagtuo si Monte de Ramos nga “gibaligya” siya sa amo sa iyang kapuyo nga maoy namaligya og illegal drugs.

Apan ang iyang kapuyo nga si Brendo Aldecera nasikop sa usa ka buy-bust sa Pebrero 27, 2022 sa Dakbayan sa Mandaue hinungdan nga nabilanggo.

Si Monte de Ramos kasamtangang gibilanggo sa Talisay City Police Station.

Matod ni Police Lt. Colonel Randy Caballes, Talisay City police chief, si Monte de Ramos maisip nga provincial high value individual base sa gidaghanon sa illegal drugs nga nasakmit gikan kaniya.

Samtang usa ka Ruben Geloca, 21, taga 369 GCQ, Sityo Bugnay, Barangay Labangon, Siyudad sa Sugbo, nadakpan pasado alas 12:00 sa kadlawon sa samang adlaw sa mga sakop sa City Drug Enforcement Unit sa Barangay Labangon, ning siyudad.

Moabot sa P467,000 nga balor sa shabu ang nasakmit gikan kang Geloca.