Nagkadaiyang mga kinhason ug uban pang mga produkto gikan sa dagat nga gituohang i-export unta nasakmit sa raid sa Cebu City Criminal Investigation and Detection Group (CIDG) niadtong Hunyo 30, 2021 sa Barangay Punta Engaño, Dakbayan sa Lapu-Lapu.

Ang mga suspek nga sila si Emilio Arco, 58, ug pag-umangkon nga si Bryan Arco, 31, nadakpan ug gipasakaan na og kaso sa kalapasan sa Section 97 sa Republic Act 8550 kun Philippine Fisheries Code of 1998.

Nasakmit gikan sa mga Arco ang 3,213 nga budyong nga balor og P11.4 million; 3 ka mga kahon sa triton shells (P199,000); 384 ka giant clams (P273,000); 109 ka gagmay nga clams (P101,000); 52 ka kilo sa lion shell (90,000); 42 ka shark teeth (P600,000); 3 ka pawikan (P210,000); ug 2 ka sako sa corals (P75,000).

Ang nasakmit nga mga produkto giingong gipamalit og barato apan I-export nga mahal kay magamit kini nga mga dekorasyon, sagad sa hotels. (AYB)