PAYROLL money sa usa ka construction developer nga mobalor sa P158,000 ang gitulis sa riding in tandem sa may dalan A Bonifacio, Dakbayan sa Sugbo pasado alas 5 sa hapon, Sabado, Agusto 17, 2019.

Sa imbestigasyon sa Waterfront Police Station, sakay sa service vehicle sa Landtraders World Properties Corporation ang mga biktima nga silang Jonas Yusores, ang driver, ug si Pio Cabahug, ang cash custodian sa payroll nga mokantidad sa P158,000.

Sakay pud sa luyo sa sakyanan silang Junny Caramba, HR Construction; Reymond Jhon Sanico, security guard; Dindo Flores, admin worker; ug Romel Condes, HR Construction.

Nagsubay ang mga biktima sa dalan MJ Cuenco Avenue gikan sa Robinsons Galleria.

Pagliko sa dalan A Bonifacio duol sa Park N Go bakery, usa ka lalaki nga angkas sa usa ka motor ang kalit miabli sa ilang sakyanan sa front seat ug dayong tion sa dala niining armas ug mideklara og tulis.

Gikuha sa suspek ang tupperware box nga naa didto ang kuwarta alang sa suweldo sa mga construction worker, ug dayong sibat paingon sa D. Jakosalem Street sa Dakbayan sa Sugbo.

Ang motorsiklo adunay plane number nga 7879.

Ang mga sakop sa Waterfront Police Station nga nakadawat sa alarma dali nga mihimo og manhunt operation apan wala na nila kini maabti pa.

Nakig-alayon na sila sa Land Transportation Office sa pagsusi sa plate number sa motor nga gitug-an sa mga biktima.

Usa sa mga gitan-aw karon nga angulo ang inside job tungod nasayod ang mga suspek nga adunay dala nga dakong kuwarta ang sakay sa sakyanan ug kinsa ang naghupot niini. (Superbalita Cebu)