Sulod lang sa 24 oras nga Simultaneous Anti-Criminality and Law Enforcement Operations (SACLEO) nakasakmit ang Police Regional Office 7 (PRO 7) og P25.1 million nga balor sa ilegal nga drugas ug dul-an sa 600 ka mga tawo ang nadakpan nga dunay managlahing mga kaso.

Gisugdan sa PRO 7 ang dungan nga anti criminality operations sa tanang units sa kapulisan sa Central Visayas sa Miyerkules, Marso 29, 2023 ug natapos sa Huwebes, Marso 30, 2023, diin 597 ka mga tawo ang nasikop.

Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, nga moabot sa P25.1 million nga balor sa ilegal nga drugas ang ilang nasakmit, diin 160 ka drug personalities ang ilang nadakpan.

Nagpasabot lang kini kon unsa ka seryuso ang kapulisan pagbatok sa ilegal nga drugas.

Ang labing dako og nasakmit mao ang Cebu City Police Office nga nakasakmit og P9,792,068 nga balor sa illegal drugs.

Gisundan kini sa Lapu-Lapu City Police Office nga nakasakmit og P7,303,880 ug ikatulo ang Cebu Police Provincial Office (CPPO) nga nitali og P5,226,616.

Ang Mandaue City nakasakmit og P2,001, 852 nga balor sa ilegal nga drugas.

Ang matag kilo sa shabu dunay street drug price (SDP) nga P6.8 milyunes.

Lakip sa ilang nadakpan ang 182 ka mga sugarol nga nagpahigayon og illegal gambling operations, sama sa tigbakay ug illegal numbers game sama sa swertres.

Moabot usab sa 220 ka mga armas ang nasakmit sa kapulisan apil na niini ang gipang surrender sa matag police station.