Mangayo og tabang si Lapu-Lapu City Mayor Junard “Ahong” Chan sa 10 ka mga senador aron mapundohan ang P367 milyones nga balor sa mga infrastructure project sa dakbayan karong tuiga.

Kini human gipasar sa City Council sa mass motion ang 10 ka mga resolusyon nga gi-endorso sa 10 ka mga konsehal nga nangayo og financial assistance sa mga senador atol sa ilang special session niadtong Martes, Septiyembre 6, 2022.

Ang Kagamhanan sa Dakbayan nagplano sa paghimo og multi-purpose buildings, classrooms, road asphalting, diversion road, road improvement ug drainage rehabilitation, access road, evacuation center, ug pedestrian skywalks.

Sa kinatibuk-an, mokabat sa P273 milyunes ang pangayuon sa mayor gikan sa mga senador.

Si City Councilor Annabeth Cuizon, kinsa maoy chairman sa committee on finance and appropriations, nitug-an sa SunStar Cebu nga ang Kagamhanan sa Dakbayan nangayo og tabang sa mga senador tungod sa kakuwang sa pundo.

Sa report sa Public Information Office sa dakbayan, personal nga dad-on ni Chan ang mga aprobado nga resolusyon ngadto sa mga senador sugod sa Miyerkules, Septiyembre 7.

Gikatakdang mangayo ang mayor og P50 milyones kang Senador Sherwin Gatchalian alang sa katukoran sa mga multi-purpose school building sa Barangay Caohagan ug Babag.

Sa tabang ni Gatchalian, usa ka duha ka andana nga edipisyo nga langkuban sa unom ka mga classroom ang gipaabot nga mobarog sa Barangay Caohagan ug upat ka andana nga mga edipisyo nga adunay 12 ka mga classroom sa Barangay Babag.

“Whereas, Lapu-Lapu City government has limited resources to undertake the construction of new school buildings as the city is focusing on the repair and rehabilitation of existing government facilities that were destroyed and damaged by Super Typhoon Odette,” mabasa sa common provision sa mga resolution.

Gawas niini, mangayo sab si Chan kang Senador Ronald dela Rosa og P20 milyones nga pundo alang sa road asphalting sulod sa Mactan-Benito Ebuen Air Base.

Mohangyo usab ang mayor og P40 milyones nga pundo gikan kang Senador Christopher Lawrence “Bong” Go alang sa katukoran sa diversion road gikan sa Sudtunggan-Basak paingon sa Barangay Gabi sa lungsod sa Cordova kay ilang tumong nga moluag ang kahimtang sa trapiko sa main road sa Barangay Basak.

Kabahin sa pagpaayo sa Washington road ug drainage rehabilitation sa George Tampus road, nga parehong nahimutang sa Barangay Basak, si Chan mangayo og P70 milyones nga hinabang gikan kang Senador Juan Edgardo “Sonny” Angara.

Gitakda usab niya nga mangayo og P10 milyones nga tabang nga pundo kang Senador Raffy Tulfo alang sa katukoran sa access road ilawom sa unang Mactan-Mandaue bridge nga magsilbi nga alternatibong dalan.

Si Chan mangayo sab og P35 milyones nga tabang nga pundo kang Senador Francis Tolentino sa pagtukod og evacuation center sa isla sa Olango, diin adunay dul-an sa 50,000 ka mga residente nga kasagaran nag-antos sa pagkuso-kuso sa mga bagyo.

Aron makatabang sa pagtukod sa upat ka pedestrian skywalks sa Barangay Basak main road paingon sa Barangay Marigondon, ang mayor mangayo usab og P48 milyones kang Senador Juan Miguel Zubiri.