MINILYON nga balor sa ilegal nga drugas ang nakuha sa buy-bust operation sa mga sakop sa San Nicolas Police Station 6 sa Sitio Bato, Barangay Ermita, Dakbayan sa Sugbo alas 10 sa gabii, Agusto 23, 2019.

Ang nadakpan mao si Ludevico Villacorta Abadiez alyas “Cocoy,” 39, nagpuyo ra usab sa maong lugar.

Nangulo sa buy-bust operation si Police Major Kenneth Paul Albotra.

Nakuha kang Abadiez ang dagkong putos sa gituohang shabu nga motimbang sa 520 gramos nga mo balor sa P3,536,000, ug usa ka kalibre .45 nga pistola ug magazine niini lakip ang mga bala.

Giangkon ni Abadiez nga ihatod ra ang maong ilegal nga drugas sa ilang balay ug dunay laing tawo nga mokuha niini bugti sa usa ka libo nga bayad.

Si Abadiez moatubang sa kasong kalapasan sa Republic Act 9165, o ang Comprehensive Dangerous Drugs Act of 2002. (Superbalita Cebu)