Matuman ang dugay na nga gipandandoy sa mga Oponganon nga makabaton og socialized housing alang sa mga kabus sa Dakbayan sa Lapu-Lapu.

Kini human nga nagpinirmahay na og joint venture agreement (JVA) ang kagamhanan ug Premium Mega Structures Inc. (PMI) sa pag-ugmad sa kapin sa 128 ka ektaryang luna sa Barangay Canjulao nga walay gasto ang kagamhanan.

Si Lapu-Lapu City Mayor Junard Chan maoy mipirma sa kasabotan sa habig sa kagamhanan ug si Francis Lloyd Chua, presidente sa sa PMI, sa habig sa kontraktor.

Ang seremonya sa pagpirma sa JVA gipahigayon sa Liberty Shrine sa Barangay Mactan kagahapon, Hunyo 23, ug gisunod dayon ang groundbreaking sa dapit human sa pinirmahay.

Moabot sa P3.7 bilyunes ang budget sa pagpatukod sa Lapu-Lapu City Socialized Housing and Urban Development Project.

Matod ni Chan, ang 25 ka ektarya sa 128 ka ektaryang luna gitagana sa socialized housing ug ang uban alang sa industrial ug commercial development

“This is another ‘City’ a little city because this 25-hectare, aduna siyay adjoining nga 103-hectare development, industrial, commercial, mixed ni siya nga mas daghan pa nga ilang mahimo panginabuhian sa maong area, mas bibo pa kaysa ilang gipuy-an ang ilang kabalhinan,” matod ni Chan.

Gikatakdang mahuman ang socialized housing sa mosunod duha ka tuig ug makabenepisyo ang moabot sa 3,000 ka mga Oponganon.

Niadtong Mayo 2021 ang konseho sa dakbayan pinangulohan ni Bise Mayor Celsi Sitoy nipasar og resolusyon nga nagtugot kang Chan nga mosulod og kasabotan tali sa PMI.

Ang resolusyon nagkanayon nga si kanhi Presidente Gloria Macapagal Arroyo miluwat og proclamation no. 346 niadtong Marso 26, 2003 nga maghatag og moabot sa 25.24 ektaryang luna sa Canjulao alang sa socialized housing.

“At last, the most-awaited, long-time dream of the Oponganon, nga makabaton na sila og disenteng pagpuyo, ug na feel nila unsa sila ka importante,” matod ni Konsehal Junrey Gestopa. (GCM)