MOKABAT sa dul-an P3 milyunes nga shabu ang nasakmit sa tulo ka managlahing mga buy-bust operation sa kapulisan.

Nabutyag usab nga padayon ang pagsulod sa shabu nga nagagikan sa Metro Manila pinaagi sa transaksyon sa mga durugista sa National Bilibid Prisons (NBP) sa Muntinlupa City.

Sa walo ka mga tawo nga nadakpan, unom niini gikonsiderar nga mga high value target sa mga operatiba sa Cebu City Police Office ug Cebu Police Provincial Office.

Unang hugna gihimo pasado alas 6 sa Biyernes sa gabii, diin upat ang nadakpan Provincial Intelligence Branch ug Provincial Drug Enforcement Unit sa CPPO sa Purok Malipayon, Barangay Mohon, Dakbayan sa Talisay. Ang ronda pinangulohan ni P/Lt. Col. Marlu Conag, pangu sa PIB.

Giila ni Conag ang ilang mga dinakpan nga sila si Karlo Abbu, 29, lumolupyo sa Barangay Labangon, Siyudad sa Sugbo, habal-habal drayber.

Lakip sa nasikop sila si Edwin Saraosos, 47, nag-abang sa balay; Michelle Mapalo, 34, way trabaho, taga Barangay Tisa; ug Gina Lomen, 31, taga Barangay Taytay, Dakbayan sa Danao.

Nasakmit ang P1.3 milyones nga balor sa shabu, lakip na ang usa ka medium sized nga maoy gipalit sa posuer buyer.

Ang upat gihulagway nga mga HVT base sa gidaghanon sa drugas nga nasakmit.

Si Abbu nga nahinabi sa Superbalita Cebu niingon nga ang iyang uyoan nga atoa sa NBP motawag kaniya kon kanus-a ang adlaw sa pagkuha sa o pakigkita niini sa tawo nga gitahasan sa uyoan aron mahatag kaniya og bag-ong abot nga drugas.

Samtang si Lomen niangkon nga bugti sa P3,000 siya ang makigtagbo sa ilang ka text sa pagahatdan og shabu.

Si Mohon Barangay Captain Vicente Bas nakurat sa gidaghanon sa shabu nga nasakmit gikan sa balay nga giabangan ni Saraosos tungod kay mga bag-o lang namuyo sa iyang barangay.

Pila ka oras ang milabay, mihimo og follow-up operation ang mga pulis sa Sityo Camagong, Barangay Lahug.

Ang nadakpan sa PIB nadugangan og tulo. Kini mao sila si Aljen Villaflores, 19, target; ug iyaan niini nga si Rosemarie Angcon, 40.

Samtang naatlan sa mga pulis si Mariel Pugoy, 22, nga mopalit og shabu.

Nasakmit sa ikaduhang buy-bust ang P1.3 milyones nga balor sa drugas.

Matod pa ni Conag ang shabu nga nasakmit sa duha ka mga operasyon usa lamang ang tinubdan.

Sa laing buy-bust, kanhi tighiwa og karneng baboy sa usa ka mall apan napapha kay napupos na ang kontrata, napugos sa nga tighatud og shabu.

Si Arniel Empes, 25, taga Sityo Lower Torre sa Barangay Inayawan, nadakapan sa Sabado sa kaadlawon sa City Drug Enforcement Unit sa CCPO.

Si P/Lt. Col. Frankie Jingle Lugo, nangu sa buy-bust.

Dul-an sa P1 million nga balor sa shabu nasakmit sa buy-bust operation sa Barangay Inayawan. / BBT, FMD