WA NA unyay utang ang Cebu City Government ug matiwas na ang 10 ka andanang Cebu City Medical Center (CCMC).

Kini human giaprobahan sa City Council ang P4.5 bilyones nga supplemental budget number 1 nga gipangayo ni Mayor Edgardo Labella.

Labing dagko nga pahat nga nalakip sa SB 1 mao ang bayad sa P1.16 bilyones nga balanse sa utang sa pagtukod sa South Road Properties (SRP) niadtong 1995 ug P1 bilyones nga dugang pundo aron sa pagtiwas sa bag-ong CCMC nga karon unom pa ka andana. Matuman na ang planong 10-storey building.

Apil usab sa SB1 ang P200 milyones alang sa financial assistance sa senior citizens gikan sa Oktubre hangtod sa Disyembre ug P36.8 milyones alang sa persons with disabilities (PWD) sa samang mga buwan.

Gigahinan sab ni Labella og P140 milyones nga pundo alang sa libreng pagpa-ospital ilawom sa (Champ) program ug P70 milyones alang sa drugs and medicines.

Duna say P230 milyones kansang tax amnesty gipahimuslan sa Cebu City niadtong 2009-2010 gikan sa orihinal nga kapin P1 bilyon.

Naapil usab ang P143.5 milyones nga barangay subsidy alang sa Covid-19 ubos sa aid to the barangay to heal as one diin benepisyaryo niini ang Lupon, tanod, barangay environment officers, drivers/loaders, street sweepers.

Lakip usab ang dugang manpower reinforcement alang sa Covid-19 vaccinations nga langkuban sa mga job order balor og P112.7 milyones.

Ang SB1 giduso ni Labella niadto pang Abril apan wala dayon kini maatiman sanglit daghan og mga giusab. (PAC)