NASAKMIT sa Bureau of Customs (Boc) sa Port of Cebu ang ukay-ukay nga mobalor og P4.5 milyones sa dihang gisuwayan kini sa pagpayuhot sa Sugbo.

Ang maong ukay-ukay gikan kini sa China ug niabot sa Sugbo niadtong Agusto 20, 2020.

Matod sa impormasyon nga nahipos sa BoC Port of Cebu, gi-declare ang maong shipment isip Inward Foreign Manifest nga hotel supplies.

Ang GRR Trading ginganlan nga shipment consignee. Adunay nasakmit kaniadto sa susamang importer hinungdan nga gipa-xray inspection ang mga kargamento nini.

Niadtong Agusto 28, niluwat na og pre-lodgment control order si BOC Port of Cebu District Collector Charlito Martin Mendoza.

Sa susamang adlaw usab gihimo ni Customs Examiner Jay Oyao ang 100% physical examination inubanan sa mga representante sa Customs Intelligence and Investigation Service, Enforcement and Security Service, X-Ray Inspection Project Team, Philippine Coast Guard, Philippine Drug Enforcement Agency, ug sa Chamber of Customs Brokers, Inc. Cebu Chapter.

Atol sa eksaminasyon, nakatala sila og 694 ka binandol nga ukay-ukay nga ipamaligya unta sa mga merkado sa Sugbo.

Si Mendoza niisyu sa warrant of seizure and detention (WSD) tungod kay ang shipment supak sa Republic Act No. 4653 nga nagdili sa importasyon sa mga ginamit nga sinina o ukay-ukay aron malikayan ang pagtakod sa sakitsakit ug mamintinar ang dignidad sa Pilipinas isip nasod, matod sa Facebook post sa BOC Port of Cebu.

Subay sa maong kalambuan nipasaka na usab ang Bureau’s Action Team Against Smugglers og kasong kriminal batok sa GRR Trading ngadto sa Department of Justice sa di makatarunganon nga importation sa mga sigarilyo nga nibalor og P234.7 milyunes.

Gibakwi na usab sa Account Management Office sa BoC ang importer’s accreditation sa GRR Trading.