Ipa-laminate sa kagamhanan sa Dakbayan sa Lapu-Lapu ang ilang nadawat nga P5,000 nga commemorative bill ni Datu Lapu-Lapu gikan sa Bangko Sentral ng Pilpinas (BSP).

Ila kining i-display isip kabahin sa ika-500 ka tuig nga kasumaran sa Kadaugan sa Mactan karong Abril 27.

Usa lang ka kabuok sa nahisgotang salapi ang nadawat sa kagamhanan sa pagkakaron.

Apan gibutyag ni Cindi King-Chan, ang pangulo sa City Tourism Cultural and Historical Affairs Commission (TCHAC), nga nagpareserba na sila ug moabot sa 200 ka kopya unya sa naasoyng salapi.

Adunay 1,000 lang kabuok ang planong iprinta sa P5,000 sa BSP ug daghan na ang nagpareserba nga ganahan makahupot niini.

Plano sa kagamhanan nga kun ugaling makahupot sila sa 200 ka buok sa naasoyng salapi mao na unya kini ang ilang ihatag sa ilang mga espesyal nga bisita sa mga kalihukan sa dakbayan sa umaabot.

“Instead nga naandang guitar atoang ihatag kani na unya,” matod ni Chan.

Samtang gibutyag ni Lapu-Lapu City Mayor Junard Chan nga ilang giimbitar si Presidente Rodrigo Duterte sa kasaulogan unya sa ika-500 ka tuig nga Kadaugan sa Mactan.

Kini isip pasalamat sa presidente sa iyang pagpangusog nga matagaan og tiunay nga pasidungog ang bayaning si Datu Lapu-Lapu.

Ang presidente maoy usa usab sa misugyot kalabot sa paghimo og salapi nga anaa ang nawong sni Lapulapu.

Nanghinaot si Chan nga mas maayo og regular na nga moprinta ang BSP kalabot sa naasoyng bill. (GCM)