KAPIN sa tunga sa milyon ka pesos nga balor sa gidiling drugas ang nasakmit sa duha ka laing hugna sa anti illegal drug operations sa dakbayan sa Sugbo niadtong Miyerkules, Septiyembre 23.

Pasado alas 4 sa hapon sa sa sulod sa usa ka mall sa barangay Mabolo, ang mga ahente sa Philippine Drug Enforcement Agency (PDEA)-7 ug Regional Intelligence Unit (RIU)-7 nilusad og buy-bust niresulta sa pagkasikop sa usa ka tighatod og gidiling drugas.

Si Investigator Agent 1 Mario Portugal sa PDEA-7, nangu sa operasyon, niila sa ilang dinakpan nga si Ronilo Bartolome, 40, ug molupyo sa Sityo San Agustin, Mabolo.

Nasakmit nga mga drugas gikan kang Bartolome ang 85 gramos nga shabu nga mobalor og P575 mil.

Matod ni Portugal nga miabot sa tulo ka semana ang ilang pag-monitor kang Bartolome hangtud na nga gilusad ang operasyon.

Si Mabolo Barangay Captain Frank Gajudo nga nahinabi sa Superbalita Cebu miingon nga si Bartolome anaa sa ilang Barangay Anti Drug Abuse Council (Badac) watch list.

Dugang ni Gajudo nga bisan sa pandemiya sa Covid-19 apan nagpadayon ang ilang pag-monitor sa mga ilegalista.

Ang dinakpan nga si Bartolome midepensa nga mao palang ang iyang paghatod sa maong shabu kinsa napugos lang tungod sa kalisod bugti sa P6 mil nga suhol.

Si Bartolome usa ka PUJ drayber apan nunot na sa pandemiya, naundang una sa pagmasada.

Laing nasikop sa saang adlaw mao si Luster Mirabiles 29 ug taga Sityo Mahayahay 1, Barangay Calamba nga nadakpan sa kapulioan ug nakuhaan usab og shabu. (BBT)