GIBUTYAG ni Lapu-Lapu City police director Sr. Superintendent Lemuel Obon nga adunay grupo sa “Salisi” kun maniyempohay nga ila karong gipanid-an sa dakbayan.

Kini human usa ka babayeng Taiwanese national nabiktima sa gituohang “Salisi” niadtong Dominggo sa gabii sud sa usa ka kan-anan sa Brgy Basak.

Ang biktima nailhang si Chia Ping Liu, 23, kasamtangang nanimuyo sa Chambre Hotel, duol sa Mactan Cebu International Airport (MCIA).

Nakuhaan siya og bag nga adunay sulod nga dul-an P 5,000 nga salapi, make-up kit, powerbank ug importanteng mga dokumento sama sa Visa Card ug passport.

Giingong nalipat ang si Liu samtang nagkaon uban ang mga kauban niini hinungdan nga nakahigayon ang usa ka wa mailhing babaye sa pagkuha ug pagsibat sa bag.

Nagdumili hinuon pagtumbok si Obon pila ang mga myembro niining ilang gidudahang grupo.

Gipaniguro niya nga ilang gibuhat ang tanan nga masikop kini hilabi na nga sagad sa posibleng biktimahon mga langyaw nga turista sa dakbayan.

Giklaro ni Obon nga di taga Sugbo ang maong grupo ug mituyo lang og ari aron mangigo hilabi na ning nagsingabot nga Pasko.

Sagad sa modus niini giingong lipat-lipaton ang mga biktimahunon sa mga dapit diin sagad magdasok ang mga tawo sama sa mall ug mga kan-anan.

“Kuan pa ni last month man ni, kuan man gud ni ila tirada murag hit and run. After makaigo diri og usa, mogawas napud diri sa atong area,” matod ni Obon.

Dako ang pagtuo ni Obon nga adunay nagpaluyong sindikato niining maong grupo sa “Salisi” gumikan kay matag higayon nga adunay madakpang miyembro kaniadto, aduna man dayon mopiyansa sa mga dinakpan.

Gisalikway hinuon ni Obon nga ang mga “salisi” nga ilang gi-monior sa dakbayan sa Lapu-Lapu konektado niadtong gituohan usab nga sakop sa “Glue” Gang nga nasikop sa dakbayan sa Mandaue.

“Bailable man gud ning “Salisi” unya kasagaran pud kanang mabiktima pag masauli na na (ila gamit), dili na mopasaka ug padayon og kaso kay hasol. So, ang akoa lang ngari makalagot” matod pa ni Obon.

Si Chief Inspector Juan Capacio, hepe sa Marigondon Police Station, nitug-an nga ila pang suwayan og pa-enhance ang CCTV footage sa kan-anan diini nabiktima ang usa ka Taiwanese national aron ila gayud nga mailhan ang identity sa suspetsado.

Awhag niya sa publiko nga di basta-basta biyaan ang mga gamit kon mosuroy sa mga mall o kan-anan.

“Ang problema nato foreigner ang biktimahon mao maglisod ta pahimangno sad nga bantayan ang ilang mga gamit kay kabawo naka bisag asa pud usahay magsuot-suot na sila unya bisag asa ra sad ibutang ang ilang mga gamit”.