Gihulagway ni Vice Mayor-elect Raymond Alvin Garcia nga ang kadaugan sa Partido Barug ug mga kandidato sa One Cebu pinangulohan ni Gobernador Gwendolyn Garcia dili lang alang kanila, kadaugan usab kini sa libuan ka pamilya nga nagpuyo sa 93-1 lots.

Ang vice mayor-elect sa dakbayan sa Sugbo nagkanayon nga wala pa nahuman ang ilang negusasiyon tali sa kampo ni Garcia labi na nga nag-angat ang eleksiyon niadtong higayona ug iyang gipadayag nga mo-resume ang ilang sabotsabot sunod semana.

“Magpadayon na gyud ang 93-1 nga land swap deal unya amo na ning ipadayon ang among mga negotiation. This victory is not for us but for all the occupants, residents or beneficiaries of 93-1.”

Giangkon sa umaabot nga bise mayor nga ilang isiguro sa ilang negusasiyon nga walay madehado sa ipahigayon nga land swap ug dili masita sa Commission on Audit (COA) sama sa nahitabo sa nahiunang binayloay sa yuta niadtong 2018.