Ang Cebu City Health Department (CCHD) temporaryong nisuspenso sa ilang pagpamakuna sa senior citizens kagahapon, Abril 26, 2021 apan ibalik kini dayon inig abot sa laing hugna sa supply nga bakuna.

Si Dr. Jeffrey Ibones, pangulo sa CCHD, nagkanayon nga nahurot na ang 4,600 ka doses sa Sinovac niadtong Biyernes, Abril 23 kansang vaccination gipahigayon sa UC-Banilad, Robinson Galleria ug SM Seaside City.

Matod pa ni Ibones nga sa higayon nga moabot na ang vaccine nga ihatag sa national government ug itugyan ngadto sa Department of Health kinsa mao na usab ang mobahinbahin sa bakuna ngadto sa mga local government unit, mobalik dayon sila og pamakuna.

Gipahibawo sa pangulo sa CCHD nga dako ang posibilidad nga moabot ang bakuna karong semanaha base sa iyang nasagap nga kasayoran gikan sa mga opisyal sa DOH.

Ang Cebu City adunay dul-an 20,000 ka mga senior citizens ang nipadayag sa ilang kaikag pagpabakuna ug gipanglantawan ni Ibones nga mosaka pa ang ilang gidaghanon sa mosunod nga mga semana sanglit ang dakbayan adunay kapin o kulang 100,000 ka mga tawong edaran.

Wala pa makatino si Ibones kon unsa nga klase sa bakuna ang ipadala sa national government ngadto sa DOH 7 apan base sa mga nadawat na nga mga bakuna, Sinovac ug AstraZeneca ang na-inject na sa mga tawo para sa ilang unang dose, ug isunod ang ikaduha paglabay sa 30 ka adlaw.

Ang P200 milyones nga inisyal nga gahin sa City Goverment para palit og bakona wala pa magamit sanglit hutdon una ang suplay nga ihatag sa national.sa dili pa moabot ang bakona nga gipalit sa Cebu City aron dili masayang ug magdoble nga mo-sobra na hinuon ang bakuna. (PAC)