PALO, Leyte -- Gipahugtan sa Police Regional Office-Eastern Visayas ang implementasyon sa Executive Order 28 bahin sa paggamit ug pagbaligya og mga pabuto.

Matod ni PRO-Eastern Visayas Director Dionardo Carlos, gukdon sa balaud ang bisan kinsa nga ilegal manufacturer ug mga namaligya og pabuto nga walay permit.

Giklaro usab sa kapulisan nga ubos sa maong balaud, gidili ang pagpabuto sa panimalay ug paghimo og fireworks display.

Ang lokal nga kagamhanan adunay gahom nga magbutang og firecrackers zone diin luwas kini sa disgrasya ug nagsunod sa mga kwalipikasyon.

Matod sa PRO, ang bisan kinsa nga magbaligya, mogamit, mag distribute og mga pabuto mamahimong maka multa og di mu ubos sa P20,000 ug di mu sobra sa P30,000.

Mamahimo usab nga mabilango sa di mo ubos sa unom ka buwan ug sobra sa usa ka tuig, depende sa desisyon sa korte.

Gisiguro sa PRO nga ang makompiska nga mga pabuto moagi sa insaktong proseso sa pag dispose diin pangulohan kini sa Regional Civil Security Unit-Eastern Visayas uban sa local government unit ug dokumentado sa media.

Kauban sa kapulisan sa pag-implementar ang Bureau of Fire Protection, Department of Health, Department of Environment and Natural Resources, Department of Interior and Local Government, ug uban ahensya sa gobyerno.

Giawhag sa kapulisan ang publiko sa pag-gamit og mga alternatibong pabanha ug hinay sa paggamit og pabuto. (JKDP/Superbalita Cebu)