GIBUTYAG ni Lapu-Lapu City Mayor Paz Radaza nga walay pagkunhod sa peace and order situation sa dakbayan bisan sa linuog nga kamatayon ni Christine Lee Silawan, 16.

Gihulagway sa mayor nga isolated case ang kaso sa dalagita ug wala kini nagsamin sa tinuod o kinatibuk-ang kahimtang sa kahapsay ug kalinaw sa dakbayan.

Gipasabot sa mayor nga padayon gihapon ang iyang pagsalig sa kapulisan nga kontrolado gihapon nila ang peace and order situation sa dakbayan human nasulbad dayon ang maong kaso uban sa National Bureau of Investigation (NBI) 7.

Subling gihimug-atan sa mayor nga panahon na nga ipatuman sa kabarangayan ang curfew ordinance sa dakbayan aron kalikayan ang paglaroy-laroy sa mga menor de edad sa lawom na ang kagabhion.

Sa ingon niining paagi, malikay ang mga menor de edad nga mabiktima o malambigit sa mga krimen.

Giangkon sa mayor nga adunay mga barangay sa dakbayan nga wala estriktong mopatuman sa curfew ordinance nga magsugod sa alas 11:00 sa gabii hangtod sa alas 4:00 sa kaadlawon.

“Gani gi-menosan naman gud gani nato ang paghatag ug permits sa mga disco’s kay dili ta buot nga ang kabataan naa lang gihapon sa dan sa lawom na ang kagabhion,” dugang sa mayor isip lakang human sa linog nga hitabo. (GCM)