Ang Departamento sa Edukasyon sa Central Visayas (DepEd 7) nitugyan sa paghukom sa pagsuspenso sa tanang klase sa modalidad ngadto sa 19 ka school division offices (SDO) ug mga hingtungdan nga local government units (LGUs).

Mao kini ang gisulti ni DepEd 7 Director Salustiano Jimenez sa SunStar subay sa memorandum nga gi-issue sa central office, nga naghatag og katungod sa publiko ug pribadong tunghaan sa pagsuspenso sa mga klase ug uban pang aktibidad nga may kalabotan sa pagtudlo sulod sa Enero 2022 taliwala sa nagkadaghang mga kaso sa coronavirus disease (Covid-19) sa nasud.

Gawas sa Siquijor, ang tanang mga LGU sa rehiyon gipaubos na sa Alert Level 3 status hangtod sa Enero 31.

Sa pagkutlo sa implementasyon sa situation-location-based approach, si Jimenez niingon nga dili lang siya makahatag sa direktiba sa pagsuspenso sa klase sa tibuok Central Visayas.

“Personally, as the regional director, I cannot give the issuance across Central Visayas kay lahi-lahi man gud og sitwasyon ang mga lugar,” matod ni Jimenez.

“Ang akong giingon sa mga superintendents nga they can decide. They can suspend but they have to coordinate gyud sa LGU kay ang LGU man maoy maka suspend og classes. So they can coordinate with the LGU and then declare suspension of classes,” dugang pa niya.

Gipasalig ni Jimenez nga aprobahan sa rehiyonal nga buhatan ang pagsuspenso sa mga klase sa higayon nga ang hingtungdang SDO, uban sa koordinasyon sa mga LGUs, mosumite sa ilang rekomendasyon.

“They have to submit to the regional office their recommendation and then i-approve rapod na nato based sa ilang mga observation kay ang mga superintendents, mas nakakita man pod sila kay sila man ang mas nakakita sa ialhang fiel,” pasabot niya.

Hinuon, gipasabot ni Jimenez nga bisan sa wala pa ang memorandum, iya nang gitugyan ang discretion ngadto sa SDO human sa pagkuso-kuso sa Bagyong Odette nga nagbilin og P6 milyones nga danyos sa learning materials ug classrooms niadtong Enero 15.

Bisan pa niana, ang regional director niingon nga nibalik na ang klase niadtong Enero 4 sa tanang walo ka publikong mga tunghaan sa Sugbo ingon man sa duha ka pribadong tunghaan nga miapil sa pilot nga implementasyon sa limitado nga face-to-face nga klase.

Samtang adunay pipila ka mga eskuwelahan nga gisuspinde na ang pagpatuman sa modular distance learning, si Jimenez miingon nga ang ubang mga eskuwelahan nakapadayon pinaagi sa tabang sa dili kaayo apektado nga mga dibisyon.