NISUGYOT ang usa ka taas nga opisyal sa Department of Public Works and Highways sa Central Visayas nga ang mga local government unit na ang mopatuman sa mga infrastructure project sa Department of Education.

Kini kon wa nay contractor nga mosalmot sa bidding nga himuon sa DPWH, sumala ni DPWH 7 Director Edgar Tabacon.

Siya nisulti niini human si Negros Oriental Governor Roel Degamo nipadayag sa iyang reklamo batok sa DPWH 7 atol sa ikaduhang quarter nga tigom sa Regional Development Council (RDC) 7 niadtong Biyernes, Hunyo 21, sa probinsya sa Siquijor.

Matod sa reelected governor nga mas ganahan ang DPWH mopatuman og horizontal projects sa mga kongresista sama sa pagpalapad sa mga karsada kaysa vertical projects sama sa pagpatukod og school buildings sa DepEd.

Si Tabacon niangkon nga nakasugat sila’g mga problema sa pagpatuman sa infrastructure projects sa DepEd labi na sa Negros Oriental.

Siya niyagyag sa mga rason kon nganong way mga contractor ang moapil sa bidding.

Apil niini ang kalayo sa mga lugar nga tukoran sa mga proyekto, dili accessible ang agianan, ug isyu sa seguridad.

Sugyot ni Tabacon nga mas maayo ang DepEd mosud og memorandum of agreement tali sa mga LGU nga dunay kapabilidad aron kini na ang mo-undertake sa mga proyekto.

Siya nidugang nga ang DepEd isip maoy tag-iya sa mga proyekto, maoy makabuot kon unsa ang paagi sa procurement kon walay contractor ang mosalmot sa bidding. (SCG)