Panagtapok gibasol sa pagsulbong sa Covid-19
Natala sa Eastern Visayas ang labing daghang mga kaso sa coronavirus disease 2019 (Covid-19), Sabado, Hunyo 19, 2021.
Base sa datos sa Department of Health (DOH) Eastern Visayas, labing daghan og natala sa Tacloban City nga niabot og 85 samtang sa Ormoc City 10 lang.
Labing daghan nga natala nga kaso sa rehiyon ang lalawigan sa Leyte nga dunay 228, gisundan sa Southern Leyte nga dunay 106, Samar dunay 75, Eastern Samar dunay 55, Biliran dunay 30 ug Northern Samar dunay 17 ka bag-ong kaso.
Matod sa DOH 8, ang 606 ka bag-ong kaso lakip sa 2,015 ka laboratory samples. Sa paghimo ning balita, nikabat na sa 2,610 ang aktibong kaso sa Covid-19 sa rehiyon.
Gikan pa sa miaging tuig, niabot sa 26,420 ang naigo sa Covid, 23,447 ang mga nakarekober ug dunay 363 ang nangamatay.
Gibutyag sa DOH nga ang pagsulbong sa kaso sa Covid-19 sa rehiyon gumikan sa gitawag og ‘super spreader’ sama sa birthday parties, reunions ug ubang kalihukan nga makatapok sa mga tawo.
Dugang pa sa DOH 8, mas taas usab karon ang death rate itandi sa miaging tuig, kay sa 363 nga total deaths, 209 niini o 57.58 percent natala karong tuiga.
