TUNGOD sa taho nga nagkaduol na mogawas ang bakona sa coronavirus disease 2019 (Covid-19), ang Catholic Bishops’ Conference of the Philippines (CBCP) nanawagan sa kagamhanan niadtong Sabado, Oktubre 17, 2020, nga unahon ang mga kabus, dili ang mga adunahan, gamhanan ug impluwensiyado.

Ang CBCP nihangyo sa nasudnong kagamhanan sa pagseguro sa mga kabus sa paggahin sa bakona.

“We propose this allocation plan for the Covid-19 vaccine that prioritizes those who are at most risk for infection or for severe disease because of our concern that, in the Philippines, vaccines may be allocated first to those who are wealthy, powerful, and influential,” sumala sa CBCP.

Hinuon, sa sayo pa, si Presidente Rodrigo Duterte niingon nga prayoridad ang labing kabus nga Filipino, sundalo ug kapulisan sa bakona.

Ang United States firm Johnson & Johnson-Janssen Pharmaceuticals, Chinese company Sinovac, ug Russia’s Gamaleya Research Institute pulos magpahigayon sa Phase 3 sa clinical trials alang posible nga kandidato aa Covid-19 vaccines. (HDT, Sunstar Philippines)