MANANAGAT nga nahadlok isumbong sa pulis kay nag-inom sa gawas sa balay samtang naa pa ang Sugbo sa general community quarantine, nag-wild, amahan ug igsuon gipanungggab, usa patay samtang lain ang kritikal.

Maduguon ang kagabhion sa pamilyang Amores niadtong Dominggo, 11:30 sa gabii, Hunyo 7, 2020. Nag-wild si Alfredo Amores Jr., 36, gipanunggab sila si Alfredo Sr., ug Rolando, 46, maguwang, sa ilang balay sa Purok Acacia, Barangay Estaca, lungsod sa Compostela.

Ang tulo puro mga mananagat. Si Alfredo Sr. dead on arrival sa ospital sa Dakbayan sa Danao samtang si Rolando kritikal nga gibalhin sa usa ka tambalanan sa Dakbayan sa Sugbo.

Si Captain Vincent Zozobrado, hepe sa Compostela Police Station nga nahinabi sa Superbalita Cebu, nagkanayon nga hubog si Alfredo Jr. kay gikan nag-inom uban sa ilang mga silingan kay pista sa ilang dapit.

Sa pag-abot niya sa ilang balay daplin sa baybayon, iyang nakit-an iyang amahan ug igsuon nga nag-estorya sa gawas.

Nagkalalis sila si Alfredo Sr. ug Alfredo Jr. dihang gikasab-an sa nahauna nganong nag-inom sa gawas, naglaaglaag nga duna pay hulga sa coronavirus disease (Covid-19) ug ubos sa GCQ ang Sugbo.

Tungod sa ilang panaglalis, nikuha og kutsilyo si Alfredo Jr., giluba niya sa tuong bahin sa lawas ang amahan ug dihang niuwang ang iyang maguwang nga si Rolando, gisunod niya sa pag-ataki, gihansakan ang tuo ug walang abaga.

Wa pa matagbaw, gihansakan sa kutsilyo ang buko-buko sa iyang maguwang.

“Niulbo pagmaayo ang kasuko sa suspek, Sir, dihang mi-ana iyang amahan nga ipadakop tika sa pulis kay sige kag pabadlong manawag mi. Diha dayon, mikuhag kutsilyo giluba niya,”dugang ni Zozobrado.

Matod ni Zozobrado nga ang ang pagbablong lang sa amahan nga di mag-inom-inom kay dunay Covid-19 maoy hinungdan sa kremin. Nakakuha sila og impormasyon nga duna nay karaang panagbangi ang amahan ug anak. (GPL)