PORMAL nga nipahibalo si Mayor Michael Rama nga ang iyang partido nga Partido Barug mipaluyo sa tandem nga Ferdinand ‘Bongbong’ Marcos (BBM) ug Sara Duterte sa pagka-presidente ug bise presidente sa Mayo 9, 2022 elections.

Ang pamahayag ni Rama giluwatan human sa usa ka adlaw nga nipadayag usab sa ilang suporta ang Bakud Party sa 5th district sa lalawigan sa Sugbo nga gipangulohan ni Ramon Duterte Durano III.

“Partido Barugg, PDP-Laban, Marino (Partylist) has made the final statement, (that) our presidential candidate is BMM (and) our vice president is Sara Duterte,” padayag ni Rama.

Matod sa founder sa Partido Barug, kinsa una nang nipadayag sa ilang suporta sa anak ni Presidente Rodrigo Duterte, nga ang ilang pagpili kang Marcos maoy majority decision sa mga miyembro sa ilang partido human sa gihimo nga konsultasyon uban sa national personalities nga wala na hinganli ni Rama.

Lakip sa mga nitambong atol sa pagpahibalo ni Rama mao si Konsehal Raymond Alvin Garcia nga nidagan pagka-bise mayor, Vice Mayor Dondon Hontiveros, kandidato pagkakongresista Konsehal Eduardo Rama, Konsehal James Cuenco, Jerry Guardo, kandidato pagka-konsehal Dr. Peter Mancao, Noel Wenceslao, Kapitan Harry Yran, Atty. Rey Gealon ug Maria Pino.

Ang Barug unang nipadayag sa suporta kang Sara sa pagka presidente,

Ang grupo sa Bando Osmeña Pundok Kauswagan (BOPK) nga gipangulohan ni kanhi Mayor Tomas Osmeña niindurso ni Vice President Leni Robredo sa pagka-presidente ug ni Senate President Vicente Sotto III sa pagka-bise presidente, dili ang running mate ni Leni nga si Kiko Pangilinan.

Si mayoralty candidate Dave Tumulak, kinsa usa sa nihagit ni Rama sa pagka-mayor, gikatakda usab nga moanunsyo sa iyang national party ug sa presidentiable nga iyang ikampanya sa dakbayan sa Sugbo.