GISAWAY sa Philippine Olympic Committee (POC) ang Philippine Athletics Track and Field Association (Patafa) sa wala pag-endorso niini kang Filipino pole vault Olympian EJ Obiena alang sa nagkadaiyang mayoriyang international competitions.

Matod sa POC nga si Obiena, kinsa ikalima sa world rankings, nisuwat sa Patafa aron makakuha og endorsements alang sa upat ka mga kompetisyon karong tuiga.

Apan gibasura sa Patafa ang suwat ni Obiena, kinsa nagtinguha untang mosalmot sa World Indoor Championships sa Belgrade karong Marso 18-20, Southeast Asian Games sa Hanoi karong May 12-23, World Championships sa Eugene, Oregon karong Hulyo 15-24, ug Asian Games sa Hangzhou karong Septiyembre 12-25.

“Again, how many more gold medals or what more achievements does EJ need to get Patafa’s endorsement?” pangutana ni POC President Abraham “Bambol” Tolentino nga napatik sa www.gmanews.tv.

“He’s the best in Asia and his numbers have been rising consistently, but still he’s bound to be denied more medals for the country.”

Dayag na sa publiko nga adunay panagbangi sila si Obiena ug Patafa president Philip Ella Juico.