Human madaot sa pag-igo ni bagyong Odette, sirhan sulod sa tulo ka buwan ang Pescador Island sa lungsod sa Moalboal aron makahatag og higayon sa corals ug mga isda nga ma-rehabilitate.

Kini maoy bag-ong resolusyon nga gipasar sa Konseho sa lungsod nga gilagdaan ni Moalboal Mayor Paz Rozgoni.

“Pagkakaron ato sa na siyang ipapahulay kay kon sa inahan pa, mura na siya og nakuhaan,” matod ni Rozgoni pinaagi sa Sugbo News, news portal sa Probinsya.

Subay sa nasabutan sa local government unit (LGU )kauban si Cebu Governor Gwendolyn Garcia ug mga opisyal sa Department of Tourism (DOT-7), mopahigayon sila og coral planting.

Magpatabang usab ang Kapitolyo sa Philippine Coast Guard (PCG) ug uban pang ahensya aron dunay makaabag sa maong kalihukan.

Ang lungsod sa Moalboal nga nahimutang sa habagatan kasadpang bahin sa Sugbo usa sa 36 ka mga lungsod nga labing gikusokuso sa bagyong Odette sa Disyembre 16, 2021.

Gawas sa corals, nangadaot usab ang mga establisemento sa lugar ug ubang tourism attractions ug destinations.

Si Rozgoni nga usa usab ka dive master personal nga misusi sa kahimtang sa kadagatan libot sa isla.

“Through this initiative, it is hoped that the disrupted underwater resources surrounding the island will revitalize and slowly regain its world-class beauty,” saysay sa LGU Moalboal.

Subay niini, gidili usab una ang diving, snorkeling, ug island hopping sa maong isla.

Hinuon, bukas pa ang ubang dive sites sa ubang beach sa lungsod nga bisitahon.

Ang Kapitolyo una nang nisaad nga moabag sa rehabilitation sa isla.