Mas paspas nga pagbiyahe ug makatabang sa malambuon nga ekonomiya alang sa Sugbo, maoy paghulagway ni Presidente Ferdinand Marcos Jr. atol sa pormal nga pag inaugurate sa labing unang “smart port,” ang Pier 88 sa lungsod sa Liloan sa Sabado, Mayo 27, 2023.

Ang Pier 88 usa ka pribadong pantalan nga nahimutang sa Barangay Poblacion, Lungsod sa Liloan.

Ang mga barko sa pantalan mobiyahe padulong sa mga isla sa Camotes, usa sa mga dapit sa lalawigan sa Sugbo nga gitutokan ni Gobernador Gwendolyn Garcia nga molambo ang turismo.

Matod ni Marcos nga nahinumdom pa siya sa una niyang pagbisita sa isla sa Camotes nga wala pa kini’y mga resort ug uban pang economic activities.

Apan subay sa pagbukas sa Pier 88, gilauman nga mas molambo ang turismo ug ekonomiya sa lugar sa kinatibuk-an.

Gidugang usab niya nga subay sa nakitang dagkong mga proyekto ug programa nga gipatuman sa mga lokal nga kagamhanan sa Sugbo, nasabtan niya nga tuyo nga makab-ot sa Sugbo ang Mega Cebu.

Nagtuo siya nga dili kini layo nga makab-ot ilabi na kon mopadayon ang panaghiusa sa mga lokalidad alang sa kalamboan.

“Our response to this is what we have come to call the whole of government approach. When we are confronted with challenges or when we have a program that we would like to achieve, we apply all the resources, all the capacities, all the abilities of the bureaucracy of government and no matter what department they are, no matter what agency they might be, they are all applied to solve that problem and that includes the coordination between the national government and the local government,” matod ni Marcos.

Ang pantalan adunay gidak-on nga tulo ka ektarya nga dili lang magsilbing pantalan, duna sab kini nagkadaiyang mga tindahan ug services.

Apil sa ningtambong sa kalihukan sila si Gobernador Garcia, Tourism Secretary Christina Garcia Frasco, 5th District Rep. Vincent Franco “Duke” Frasco, kadagkuan sa management sa pantalan ug ubang mga opisyal.

Si Garcia nagtinguha nga mahimong mas paspas ang biyahe gikan sa mainland Cebu padulong sa Camotes nga manukad sa lungsod sa Liloan.

Gitawag kini nga smart port gumikan kay mogamit kini sa modernong sistema, diin i-integrate ang QR code, Radio Frequency Identification (RFID) system sa mobile app unya nga mahimong gamiton sa mga pasahero.