NIPADAYAG sa ilang kasagmuyo ang mga sakop sa Piston Cebu sa gikatakda nga pagpatuman sa excise tax diha sa mga fuel products Martes, Enero 15.

Matud ni Greg Perez, ang pangulo sa Piston Cebu nga daan na nila gipanawagan ang pagbatok sa maong balaudnon, kay alang kanila, musamot og duot sa kakabus ang mga yano nga driver ug operator sa mga pampublikong sakyanan.

Ang laing dugang nga nakapasubo kanila, ang giingong gikatakda usab nga pag-umento sa presyo sa lana.

“Kami sa Piston daan nami nga naga batok sa maong balaud kay samot namu nga makadaot ug dugang crus nga palas-anon ni Juan dela Cruz.

Ang nakaparat ani kay nisabay pud ang mga oil company sa pag umento sa presyo sa matag litro sa fuel sa atong nasud,” tipik sa text message ni Perez sa Superbalita Cebu.

“Busa mokabat sa P4.54 ang pagsaka ugma (Enero 15). Nga maoy pinakataas nga umento sakasaysayan sa fuel increase sa atong nasud,” dugang ni Perez.

Makigtagbo si Perez sa iyang kaubanan nga Piston sa Sugbo, su’d ning semanaha.

Nagplano sila nga usa ka rally ang ipahigayon unya pagpakita sa ilang kadismaya sa pagpatuman sa maong excise tax.