GIKUWESTIYON ni Kong. Pablo John F. Garcia, representante sa 3rd District sa Sugbo, ang memorandum circulars sa Department of Interior and Local Government (DILG) ngadto sa local government units (LGUs) bahin sa (1) paghawan sa kadalan ug (2) pagdili sa tricycles o pedicabs sa nasudnong kadalanan.

Ang maong memorandum circulars nga naglatid og tagal nga Abril 30, 2020 sa pagpatuman sa mando ug nipasidaan kini nga ang LGUs di motuman pasakaan og kasong administratiba ubos sa Section 60 sa Local Government Code.

Base sa kopya sa iyang privilege speech ni Deputy Speaker Garcia sa Ubos Balay-Balauranan kagahapon, Marso 10, nga gipadala sa Superbalita Cebu, gipaklaro usab niya nga ang awtonomiya sa LGUs ug ang papel sa DILG sa pagseguro nga napatuman ang programa ug polisiya sa kagamhanan.

Matod ni Garcia, ang regulasyon sa public roads nasulod sa express powers sa LGUs, ug ang paghawan sa kadalanan ug pagdili sa tricycles ug pedicabs nalatid ubos sa general power sa LGU.

“We all share in the objective sought to be achieved: Who doesn’t want roads cleared of obstructions; who doesn’t want safer, smoother trips along national highways?” pahayag ni Garcia.

Apan ang nalatid sa national objective gitumong kini sa pagpatuman nga autonomous, dili ang pagpugos sa LGUs sa paghimo sa ilang gahom ubos sa pagdiktar sa DILG.

Matod ni Garcia, ang DILG niluwat og memorandum circular nga nagmando sa mga siyudad ug munisipalidad sa pagtukod og “Tricycle Task Force”, ang DILG pa ang modeterminar sa iyang komposisyon, specific duties ug functions.

“It would seem that sanggunians cannot be trusted to figure this out for themselves... What is the DILG’s legal basis for ordering LGUs to implement national policy, supplanting the local legislative body’s will,” matod ni Garcia.

“Kanus-a nasugod ang pagkontrolar sa DILG sa mga LGU?” dason ni Garcia.

Gipasabot niya nga dili sa maong matang nga relasyon sa DILG ug LGUs dihang napasar ang Local Government Code sa pagpatuman sa constitutional grant sa local autonomy.

Ang Executive, uban sa DILG isip alter ego, dunay general supervision tali sa local government units, “to ensure that their acts are within the scope of their prescribed powers and functions,” ingon ni Garcia.

Daghang LGUs ang ningreklamo sa paghatag og tagal sa DILG sa pagtuman sa road clearing tungod sa managlahing sitwasyon sa ilang kahimtang sa kadalanan nga imposible nga matuman sulod lang sa 75 ka adlaw nga tagal.

Sa panapos nga pakigpulong ni Garcia, kini nipasabot sa ka importante sa Kongreso nga mokuwestiyon aron pagpahapsay sa pagpatuman sa mga gahom sa sanga ug ahensiya sa kagamhanan diha sa insaktong perspektiba subay sa konstitusyon nga nag-ila sa espiritu sa lokal nga awtonomiya. (RRM)