Naalarma sa mga basura ang Dakbayan sa Talisay kay niabot na sa kadagatan sa siyudad.

Kini maoy giangkon ni Joselito Sumabat, senior science research specialist sa Coastal Resources and Ecosystems Research, Development and Extension Center (CRERDEC) sa Department of Environment and Natural Resources (DENR).

Dugang ni Sumabat nga 90 porsyento sa mga dapit sa Talisay dunay problema sa mga basura, labina sa plastik.

Tungod sa maong sitwasyon, moduyog sa International Clean-Up Drive ang Siyudad sa Septiyembre 17.

Ang pagpanglimpyo sa kadagatan ug kabaybayunan maoy unang tumong sa DENR.

Matod ni Sumabat nga ang mga plastik nga manglutaw sa kadagatan makaon usab sa mga isda.

Ang CRERDEC- Eco System Research and Development Bureau (ESRDB) naghimo karon og info dissemination sa dakbayan sa Talisay isip ilang pilot area pinaagi sa pagpakitagbo sa barangay officials uban sa mga non-government organization (NGO).

Si Bise Mayor Richard Francis “Choy” Aznar nibutyag usab nga sa dakbayan sa Talisay dako nga problema ang mga basura sa mga palibot.

Ilang bisitahon og balik ang ilang ordinansa labot sa saktong paglabay sa mga basura aron di mahiadto sa kasapaan ug kadagatan.

Gusto ni Aznar nga matagaan og ngipon ang ordinansa aron di mograbe ang suliran sa basura.