SUGOD karong Lunes, P10 ngadto sa P20 ang pagsaka sa pletihan sa mga pasaheroang vans o Garage to Terminal (GT) Express nga magbiyahian sa mga lungsod sa Tuburan ug Asturias sa lalawigan sa Sugbo.

Si Engr. Joselito Cabase, chairman sa Association of Ayala, Balamban, Asturias and Tuburan (AABAT) Route, nipasabot nga ang pagpasaka sa pletihan gumikan sa pag-umento sa presyo sa mga produktong petrulyo labi na ang diesel nga maoy sagad nilang gigamit.

Gusto usab nila nga ipatuman ang insaktong pletihan nga P2 sa matag kilometro nga maoy gitugot sa Land Transportation Franchising and Regulatory Board (LTFRB) sa Central Visayas, sa kabalaka nga sila makalapas sa undercharging.

“Pero dili lang pud namo palabihan kay basin makalitan ang mga pasahero, mao amo lang usa ihinayhinay,” sumala ni Cabase nga nahinabi sa Superbalita Cebu kagahapon.

Kon basehan ang Memorandum Circular 2007-007 sa LTFRB nga nagtakda sa P2 matag kilometro nga tukmang pletihan, moabot unta sa P172 ang pleti sa GT Express gikan sa Ayala Terminal paingon sa Tuburan nga 86 kilometros ang gilay-on.

Apan sa kasamtangan, P140 ang gikolekta nga plite sa AABAT sa mga pasahero.

Karong Lunes, mahimo na kini nga P160, samtang mahimo na usab nga P130 gikan sa P120 ang pletihan gikan sa Ayala Terminal paingon sa Santa Lucia, Asturias ug vice versa; ug P140 gikan sa P130 ang pletihan gikan sa Ayala Terminal padung sa Bago, Asturias ug vice versa.

Ang AABAT may 82 ka mga miyembro, 37 niini kay operators-drivers.

Si Reynaldo Elnar, assistant regional director sa LTFRB 7, namulong nga kon dunay moreklamo, mahimong makabayad og P5,000 ang mga operator ug drayber nga mag-undercharging base sa nalatid sa Joint Administrative Order (JAO) 2014-01.

“Ang problema kinsay mo-complain,” dugang sa opisyal sa buwag nga pakighinabi ning mantalaan.

Si Elnar nidugang nga di na kinahanglan mananghid ang AABAT sa pagpatuman sa bag-ong pletihan kay nasubay kini sa gitakda sa taripa, apan kinahanglan nga magbutang sila og taripa sa mga sakyanan aron masabtan ug mahibaw-an sa mga pasahero. (SCG)