Hepe sa Cebu City Police Office (CCPO) nimando pag-imbestigar sa giingong paghikog ni Police Staff Sergeant Celso Colita pinaagi sa pagpatawag sa police escort niini human masuta nga nakagawas siya sa Police Regional Office 7 niadtong Lunes sa buntag.

Si Colita nakagawas kay aron magpa medical check-up nabalik mga alas 6 na sa gabii, kun mga 12 minutos human patya si Ritchie Nepomuceno.

Matod sa usa ka police official nga ang kapuyo ni Colita nisulti kanila nga dunay sakit nga tuberculosis ang pulis.

Sa logbook sa gate sa PRO 7, nadiskobrehan sa mga sakop sa media nga alas 8:37 Lunes sa buntag, Abril 19, 2021, nakagawas sa kampo si Colita uban sa iyang escort nga si

Police Corporal Christopher Lorete aron magpa medical check up.

Sa remarks sa logbook, nabalik sila alas 6 na sa gabii.

Si Colita ug 11 niya ka mga kauban gireklamo ni Nepomuceno nga nidakop kaniya ug nihulidap kaniya og P170,000.

Giingong gilugos pa siya ni Colita sa makaduha ka mga higayon sulod sa motel.

Tungod niini, si Police Colonel Josefino Ligan, hepe sa kapulisan sa Siyudad sa Sugbo, nimando og investigation on case sa Pardo Police Station labot sa kamatayon ni Nepomuceno aron mapatawag si Lorete ug maimbestigar.

Dinhi masuta kon asa sila niadto ug unsa ka tinuod nga nagpa medical check up sila sa usa ka tambalanan.

“Makita man na didto, apil sa iyang investigation kon kinsa ang nag escort para mapangutana nga anang adalawa asa gyud sila until nakabalik sila sa kampo,” matod ni Ligan.

Dugang ni Ligan nga angay palawman pa ang imbestigasyon tungod kay duha ka insidente ang nahitabo nga mao ang kamatayon ni Nepomuceno ug ni Colita.

Apan matod pa niya nga ang angay nga paaboton mao ang resulta sa ballistic exam sa armas ni Colita nga giingong maoy gigamit sa iyang paghikog sulod sa pansayan sa Regional

Drug Enforcement Unit (RDEU), lakip na ang cross matching sa basiyo niini kon motakdo ba sa nakuhang ebedensya sa crime scene sa dapit diin gipatay si Nepomuceno.

Mogawas ang resulta sa ballistic exam sa PNP Crime Laboratory mga duha ka semana gikan sa pagdala niini sa mga imbestigador sa ilang buhatan.

Subling gipa subay ni Ligan ang dapit diin nahitabo ang pagpusil ni Nepomuceno aron mokuha sa gipangmontar nga mga CCTV camera sa dapit sanglit ang ilang nakuha pulos guba.

“Naay nakuha nga duha ka CCTV camera pero pulos mga guba. Akong gipasusi pa ang uban. Basin naay makuha,” dugang ni Ligan.