PORTER sa adlawan ug drug courier sa gabii maoy nahibaw-an nga impormasyon sa Waterfront Police Station hinungdan nga gi-monitor nila ang usa ka lalake.

Si Police Major Joemar Pomarejos, hepe sa Waterfront Police Station nga nahinabi sa Superbalita Cebu, niingon nga ilang unang nasayran kang Alvin Fegarido, 29, taga Sityo Riverside, Barangay Tejero, Siyudad sa Sugbo, nga kini usa ka porter sa pantalan.

Apan ang ilegal nga kalihukan sa pagpundo og shabu maoy wa masayri sa iyang pamilya.

Si Fegarido nasikop sa buy-bust operation nga gipangulohan ni Pomarejos human siya napalitan og shabu ug nakuhaan pa og laing bulto.

Si Fegarido maoy binlan sa iyang agawon nga inilang drug lord sa probinsiya sa Bohol.

Mokabat sa P1.4 milyones nga balor sa shabu ang nasakmit gikan kang Fegarido.

Dugang ni Pomarejos nga alyas Daut, taga Barangay San Roque ning siyudad, apan nagpuyo na sa lungsod sa Clarin, Bohol ang amo ni Fegarido.

Kasamtangang gitanggong sa detention cell sa Waterfront police si Fegarido samtang giandam ang kaso batok kaniya. (BBT)