DUL-AN sa tulo ka oras nga nabara ang dagan sa trapiko sa habagatang bahin sa lalawigan sa Sugbo dihang usa ka trailer truck nga puno sa kargang sinako sa mga semento ang nitakilid dihang niatras alas 6:45 sa buntag niadtong Miyerkules, Mayo 22, sa national highway sa Barangay Casay, lungsod sa Dalaguete.

Ubay-ubay sa mga sinakong semento ang nagpasad sa karsada human nitakilid ang trak (AUA-1916) nga gimaniho ni Magno Cabanas, 48, taga Brgy. Ilaya, siyudad sa Tanjay, Negros Oriental.

Sigon ni Chief Insp. Roger Quijano, hepe sa Dalaguete Police Station nga nahinabi sa Superbalita Cebu, nga ang trailer truck puno sa kargang semento paingon sa Dumaguete, Negros Oriental.

Samtang nagkurbada kini sa dulhugon nga bahin sa Barangay Casay, kalit napawong ang iyang makina.

Sumala ni Jonathan Tumulak, focal person on traffic management sa Kapitolyo, samtang nag-atras ang trak, nitakilid kini ug nangatagak ang karga nga mga sinako sa semento sa karsada.

Matod ni Quijano nga tungod sa kabug-at sa karga, wala makontrolar sa driver ang trailer truck hinungdan nga niatras kini ug nibabag sa national highway. Way naangol sa hitabo.

Tungod sa nahitabo, nababoy ang dagkong mga sakyanan sama sa mga bus nga gikan ug padung sa Cebu South Bus Terminal ingon man usab ang mga bus nga gikan sa CSBT nga nagpadung sa habagatan.

Si Tumulak niasoy gipatuman ang dawat-dawat system sa mga pasahero nga nagpaingon sa CSBT ug nagpadung sa habagatan.

Ang mga pasahero nga sakay sa mga bus nga gikan sa habagatan nga wa makalahos sa terminal, gidawat sa mga bus nga wa makalahos sa south.

Samtang ang mga pasahero nga gikan sa siyudad sa Sugbo nga sakay sa mga bus nga wa usab makalahos sa habagatan, gidawat usab sa mga bus nga gikan sa habagatan.

Si Tumulak namahayag ang kagamhanan sa lungsod sa Dalaguete nipatuman og rerouting diin ang gagmay nga mga sakyanan didto gipaagi sa sa diversion.

Ang gagmay nga mga sakyanan nga gikan sa siyudad sa Sugbo, gipa-left turn sa eskina sa Brgy. Tuba, gipa-right turn sa Barangay Lumbang, gipalapos sa Barangay Kawayan ug gipa-left turn sa national highway ug vice versa alang sa mga sakyanan nga nagpaingon sa amihanan.

“Kining hitaboa karon angay nga kapanaminan sa mga LGU (local government units) nga gikinahanglan gyud diay ang diversion road labi na ning nahitabo karon nga wa gyuy nakalusot tungod kay tibuok dan man,” pahayag ni Tumulak.

Matod ni Quijano, alas 9:30 na sa buntag nahibalik sa normal ang dagan sa trapiko sa maong dapit.

Matod ni Tumulak nga tungod sa hitabo, angay tan-awon sa Department of Public Works and Highway ang dagkong mga bus nga magbiyahian paingon og habagatan ug norte tungod sa posibilidad nga sobra sa ilang kapasidad ang gibug-aton sa ilang gikarga.

“Tungod lagi nagsalig sila nga sayo pa sa buntag, way mga tinugyanan sa DPWH nga maoy mag-check nianang maong gibug-aton, hinungdan nga naa sila manggawas panahon sa buntag,” dason ni Tumulak.