SELDA sa Cebu City Police Office sa Camp Sotero Cabahug naghuot tungod sa sub-sub nga kampanya sa kapulisan sa Siyudad sa Sugbo batok sa illegal nga sugal.

Matod ni CCPO officer-in-charge Police Colonel Engelbert Soriano moabot na ngadto sa 254 ka mga tawo ang ilang nadakpan sa 181 ka anti illegal gambling operations.

Di lang sa CCPO headquarters nagdasok ang mga dinakpan, lakip na sa mga police station, gumikan kay gimandoan niya ang iyang mga sakop sa paglusad sa ilang kaugalingon nga operation sa bisan unsa nga matang sa illegal nga sugal sa kabarangayan.

Dugang ni Soriano nga wa silay gipili nga nagpataya sa swertres diha sa gawas, bisan kon adunay kompanya nga nagpakita og papel nga legal sila.

Wa nganli ni Soriano kon unsa kini, apan usa sa mga abogado niini makigkita niya aron ipakita ang desisyon sa korte nga di sila matawag nga illegal.

Apan gibutyag ni Soriano nga makig meeting siya sa hepe sa Police Regional Office 7 (PRO) 7, Brig. General Albert Ignatius Ferro, alang sa guidance labot niini. (AYB)