NAPASAKAAN na og kaso sa Police Regional Office (PRO) 7 ang mga responsabli sa pagpusil patay ni P/Sr. MSgt. Maximino Macua Jr., sakop sa PNP Drug Enforcement Group 7.

Matod ni Cebu City Police Chief P/Col. Engelbert Soriano, ang napasakaan og kaso niadtong miaging semana mao kadtong samdan nga nalandig sa Vicente Sotto Memorial Medical Center nga si Franco Obeso.

Lakip sa gipasakaan og kaso ang kauban niining babaye nga si Jeremea Zafra ug ang duha nga napatay sa follow-up operation sa managlahing lugar sa Cebu City nga silang Ronald Sagarino ug Richie Requinto.

Usa nalang ang gipangita pa, matod ni Soriano.

Si Chief PNP Police General Archie Francisco Gamboa nibisita sa haya ni Macua sa multi- purpose hall sa Camp Dagohoy sa Bohol Police Provincial Office niadtong Pebrero 19, 2020.

Gihatagan og posthumous award si Macua lakip na ang hinabang pinansyal gikan sa Philippine National Police. (AYB)