Nipagawas dayon og kamandoan ang pangulo sa Police Regional Office (PRO) 7 sa iyang mga City ug Provincial Police Office directors nga ipatuman ang pagka mabinantayon sa pagdala sa ilang mga armas sa bisan asang dapit human usa ka pulis sa dakbayan sa San Pablo, Laguna ang disgrasyang napusilan patay sa iyang kauban.

Matod ni Police Brigadier General Roderick Augustus Alba, hepe sa kapulisan sa Central Visayas (CV), kinahanglan mag-obserbar ang mga pulis sa safety and security samtang magdala sa armas.

Ipabalik niya ang pagpahinumdom sa ilang basic nga gun safety rules nga kinahanglan nga ilhon ang armas nga kanunay nga loaded sa bala.

Ang sumbohan sa armas kanunay nga nakaatubang sa ubos ug sa safety nga direction ug dili mag-dry fire sa dapit nga dunay tawo diin didto lang kini himuon sa mga shooting range.

“Treat every firearm sabi ko nga sa kanila as if it is always loaded, sabi ko I will hold accountable and responsible kung may similar incident na mangyari, that’s why I always give reminders huwag ito sana mangyari dito sa Central Visayas,” matod ni Alba.

Dugang ni Alba nga nasayod na ang mga police personnel sa lagda sa paghawid sa ilang mga armas kon mosulod sa ilang tagsatagsa ka mga buhatan.

Gani, bisan naa sa sulod sa firing range, hugot nga gidid-an ang bisan kinsa nga gun holder sa paggunit niini gawas kon gimandoan na kini sa range officer.

Dunay safe areas sa sulod sa kampo nga mamahimong didto susihon ang mga armas kon kini naka-safety ba o kon wala ba naka-load sa bala niini.

“Do not draw your firearm unless you are targeting somebody to use it, so yun yung basic dictum, I’ll take this opportunity to remind our comrades in arms na we should not replicate what happened duon sa Luzon na part,” dugang ni Alba.

Nasubo ang heneral sa nakita niya sa video ang insidente diin ang biktimang pulis ug ang nakaaksidente sakop sa Special Weapon and Tactics nga giila nga hanas na nga mogamit sa ilang mga armas.

Tungod niini, matod ni Alba, doblehon gyud ang pagbantay ug dili mosusi sa ilang mga armas atubangan sa mga kaubang pulis sanglit taas ang kahigayonan nga madisgrasya. (AYB)